Home / කේෂාලංකාර / හිසකෙස් රෝග සඳහා ආයුර්වේද සත්කාර

හිසකෙස් රෝග සඳහා ආයුර්වේද සත්කාර

2017-12-27 02:54:00       200
feature-top
සිරුරේ නිරෝගී බව
නිරෝගීමත් කෙස් කලඹක් සඳහා ශාරීරික නිරෝගී බවත් බලපානව. සමහර ශාරීරික රෝග නිසා කෙස් ආශි්‍රතවද රෝග ලක්ෂණ ඇති වෙනවා. උදාහරණයක් වශයෙන් සමහර කාලීන රෝගවලදීද, සහජ හෘදරෝගවලදීද කෙස් දුර්වල වෙනව. පිළිකා නිසාත් පිළිකාවලට භාවිත කරන ඔෟෂධ නිසාත් කෙස් ගැලවී යෑම වැනි රෝග ලක්ෂණ ඇති වෙනවා. ඒ විතරක් නෙවේ අධිකව මද්‍යසාරවලට ඇබ්බැහි වූ පිරිමින්ගේද, වයසට යෑමත් සමඟද කෙස් රෝග හට ගන්නවා. මේ කෙස් ආශි්‍රත රෝග ලක්ෂණ අතුරින් කෙස් අකලට සුදුවීම, කෙස් වැඩිපුර ගැලවීයෑම, කෙස් දුර්වර්ණවීම, කෙස්වල දීප්තිමත් බව නැතිවීයෑම සහ කෙස් පහසුවෙන් කැඩීයෑම යන ලක්ෂණ දක්නට ලැබෙනවා.

පෝෂණය ඉතා වැදගත්
කෙස්වල ගනත්වයත්, එහි දීප්තිමත් පැහැය කෙරෙහිත් පෝෂණය තදින්ම බලපානව. යම් කාන්තාවකට නිරෝගී කෙස් කලඹක් පැවැතීම ඇගේ පෝෂණය විදහා දැක්වීමක්. රෝම කූපවල වර්ධනයට නොයෙකුත් අත්‍යවශ්‍ය පෝෂණ පදාර්ථ අවශ්‍ය වෙනවා. එම නිසා සමතුලිත ආහාර වේලක් දිනපතා ගැනීම කෙස්වල සුන්දරත්වයට වගේම හිසේ සමෙහි නිරෝගීමත් බවටත් ඉතා අවශ්‍ය සාධකයකි. ප්‍රෝටීන, විටමින් වර්ග, ඛනිජ ලවණ, මේද අම්ල සහ ඉතා සුළුවෙන් අවශ්‍ය වෙන තවත් බොහෝ පෝෂණ පදාර්ථ කෙස්වල වර්ධනයටත්, නිරෝගී බවටත් ඉතා අවශ්‍යයි.

තද කොළ පැහැති එළවළු හා කොළවර්ග
මේවා තුළ විශේෂයෙන්ම විටමින් A සහ C අඩංගුවන අතර ඒවා මඟින් හොඳින් Sebum ස්‍රාවය වීම උත්තේජනය කරන අතර කෙස්වලට දීප්තිමත් පැහැයක් හා තෙල් සහිත බවක් ලබාදෙනවා. කෙස් වියළීම වළක්වනවා. කෙස්වල වර්ධනය ඉක්මන් කරවනවා. එම නිසා සුන්දර, දිදුලන කෙස් කලඹක් ඔබට අවශ්‍ය නම් දිනපතාම වැඩි වැඩියෙන් කොළපාට එළවළු හා කොළ වර්ග (පලාවර්ග) ආහාරයට ගන්න.

රනිල බෝග වැඩිපුර ආහාරයට ගන්න
සෝයා බෝංචි, මෑ, බෝංචි, කව්පි වැනි රනිල කුලයට අයත් ආහාරවල යකඩ, සින්ක් සහ බයොටින් අඩංගු වෙනවා. මේවා කෙස්වල වර්ධනය ඉක්මන් කරනවා. එසේම ආහාර පරිවෘත්තියට අවශ්‍ය කරන සමහර එන්සයිමවල ක්‍රියාකාරිත්වය බයොටින්වලින් වැඩි කරන නිසා එයද වක්‍ර මාර්ගයෙන් කෙස්වල නිරෝගී බවට බලපානව. බයොටින් ආහාරයේ හිඟ වුණොත් කෙස් වැඩිපුර ගැලවී යනව වගේම පහසුවෙන් කැඩෙනසුලු වෙනවා. සෝයා බෝංචි වැනි ආහාර වැඩිපුර ආහාරයට ගන්න.

ෆෝලික් ඇසිඩ්
ශරීරයට නිතර දැනෙන තෙහෙට්ටුව සහ නිරක්තිය (ලේ මඳ බව) සමඟ කෙස් සුදුවීම පවතින්නේ නම් ඒ සමහර විට ඔබගේ ශරීරයේ ෆෝලික් අම්ලයේ උෟනතාව නිසා විය හැකිය. එවිට ෆෝලික් අම්ලය අඩංගු බිත්තර, ධාන්‍ය වර්ග වැනි ආහාර වැඩි වැඩියෙන් ගත යුතුය. මීට අමතරව විටමින් E බීට - කැරොටින් යන පෝෂණ පදාර්ථත් කෙස්වල වර්ධනයට මෙන්ම නිරෝගී බවට අවශ්‍ය වෙනවා. මේ නිසා දිනපතා කහපාට පලතුරු සහ කැරට් ආහාරයට ගන්නේ නම් සම පැහැපත් වෙනවා වගේම කෙස් වර්ධනයත් වෙනවා. කෙසේ වෙතත් සාම්ප්‍රදායික අප ගන්නා සමබල ආහාර වේලකින් ඉහත සඳහන් කළ සියලුම පෝෂණ අංග නොඅඩුව ලැබෙනවා. නමුත් පෙර සඳහන් කළ රෝග අවස්ථාවලදීද, දුම්බීම, මත්පැන් පානය වැනි ඇබ්බැහිවීම්වලින් සහ තවත් වැරැදි ආහාර පුරුදු නිසා එම පෝෂණ කොටස් නිසි පරිදි නොලැබීමෙන් කෙස් රෝගී විය හැකිය. දුර්වර්ණ විය හැකිය.

ආයුර්වේද ප්‍රතිකාර
කෙස්වල නිරෝගී බව ඇතිකරන කෙස්වල වර්ණවත් බව සහ දිදුලන බව වැඩිකරන බොහෝ ආයුර්වේද ප්‍රතිකාර ඇත. දිනපතා හිස හොඳින් සේදීම හිසෙහි සම මෙන්ම කෙස්වල පැවැත්ම කෙරෙහි අනිවාර්යය වේ. දිනපතා ඔෟෂධීය තෙල් වර්ගයක් හිසෙහි ආලේප කර හොඳින් සම්බාහනය කරන්න. තෙල් වර්ගය මඳක් රත්කර (ශරීර උෂ්ණත්වයට වඩා මඳක් වැඩියෙන්) ආලේප කිරීම හා සම්බාහනය කිරීමෙන් හිසට, රෝමකූපවලට හොඳ රුධිර සැපයුමක් ලැබේ. එසේම රෝමකූප ආශි්‍රත ස්නායු උත්තේජනය වේ. සුදුසු තෙල් වර්ගය කෙනකුගෙන් තවත් කෙනකුට වෙනස් විය හැකිය. ත්‍රිපලා තෙල්, නීල්‍යාදිය තෙල්, භෘංගාමලක තෙල් වැනි විවිධ ඔෟෂධීය තෙල් වර්ග ඇති අතර වඩා සුදුසු තෙල් වර්ගය භාවිත කළ යුතුය.

විශේෂ ඔෟෂධ
අකලට කෙස් සුදුවී ඇති අයගේ කෙස් ඉක්මනින් කළුකර ගැනීමට ත්‍රිපලා, නිල් අවරිය, කීකිරිඳිය සහ ලෞහභස්ම යන ඒවා සමව ගෙන බැටළු මුත්‍රවලින් අඹරා හිසේ හා කෙස්වල ආලේප කර සම්බාහනය කර පැය භාගයක් පමණ තිබෙන්නට හැර සෝදා හරින්න. මෙය සතියකට තුන්වරක් බැඟින් කීප වරක් කිරීමෙන් ප්‍රතිඵල ලැබිය හැකිය.

කෙස් ගැලවීම වැළැක්වීමට
අධිකව කෙස් ගැලවී යන අයට නෙල්ලි චූර්ණය ඊට සම ප්‍රමාණයක් අබ ඇට වියළා කුඩුකර සකස්කර ගත් චූර්ණය සමඟ අඹරා පෙර පරිදි ආලේප කර සම්බාහනය කිරීමෙන් කෙස් ගැලවීයෑම වැළැක්විය හැකිය.

කෙස් කළු කිරීමට
නිල් මානෙල් මල් එළකිරි සමඟ අඹරා එය ලෝහ බඳුනක දමා පොළොවේ වළලා මසක් තබා එළියට ගෙන එම කල්කය නැවැත එළකිරි සමඟ මිශ්‍රකර ආලේප කිරීමෙන් අකලට කෙස් සුදුවීම වළක්වා ගත හැකිය. කෙස් අකලට සුදුවීම, අධිකව ගැලවීයෑම මෙන්ම කෙස්වල දීප්තිමත් බව ඇතිකරන වටිනා ඔෟෂධ විශාල ප්‍රමාණයක් ආයුර්වේදයේ සඳහන් වේ. ඒවා ක්‍රමානුකූලව භාවිත කිරීමෙන් ඔබට ඉතා දිගු, ශක්තිමත් මෙන්ම කාන්තිමත් කෙස් කලඹක් හිමිකරගත හැකිය.

curtesy : sithmalyaya.com


More News »